Monsoon: రెండు నెలల్లో నైరుతి రుతుపవనాల పనితీరు సాధారణమే

అంచనా వేసిన భారత వాతావరణ శాఖ

దిల్లీ: రాబోయే రెండు నెలల్లో నైరుతి రుతుపవనాల పనితీరు సాధారణంగానే ఉంటుందని భారత వాతావరణ శాఖ (ఐఎమ్‌డీ) అంచనా వేసింది. ఆగస్టు-సెప్టెంబరులో  సగటు వర్షపాతం 95-105 శాతం ఉండే అవకాశం ఉందని తెలిపింది. ఈ సమయంలో దేశవ్యాప్తంగా 428.3 మిమీ వర్షపాతం రానుందని పేర్కొంది. దేశమంతటా ఆగస్టు నెలలో వర్షపాతం 94-106 శాతం మేర సాధారణంగానే ఉంటుందని తెలిపింది. ఈ పరిస్థితుల వల్ల వచ్చే ఖరీఫ్‌ పంటకు ఈ వాతావరణం అనుకూలంగా ఉంటుందని వెల్లడించింది. నైరుతి రుతుపవనాల ప్రభావంతో జులై-ఆగస్టు నెలల్లో అత్యధిక వర్షం పడుతుంది. జులై మధ్యలో దేశవ్యాప్తంగా భారీగా వర్షాలు కురిసిన సంగతి తెలిసిందే.