Andhra News: మే 5న ఐదు మండల పరిషత్‌లకు అధ్యక్ష ఎన్నికలు: ఎస్‌ఈసీ

అమరావతి: ఆంధ్రప్రదేశ్‌లోని 5 జిల్లాల్లోని 5 వేర్వేరు మండల పరిషత్‌లకు అధ్యక్షులు, ఉపాధ్యక్షుల ఎన్నికకు రాష్ట్ర ఎన్నికల కమిషన్‌ నోటిఫికేషన్‌ జారీ చేసింది. పశ్చిమ గోదావరి జిల్లాలోని నర్సాపురం, కృష్ణా జిల్లా ఉంగుటూరు, పల్నాడు జిల్లాలోని పెదకూరపాడు, నెల్లూరు జిల్లా పొదలకూరు మండల పరిషత్‌ అధ్యక్ష ఎన్నికలకు నోటిఫికేషన్‌ జారీ చేశారు. కోనసీమ జిల్లా రాయవరం మండల పరిషత్‌కు ఇద్దరు ఉపాధ్యక్షుల ఎన్నికకు నోటిఫికేషన్‌ ఇచ్చారు. మే 5న ఉదయం 11గంటలకు మండల పరిషత్‌ల అధ్యక్ష, ఉపాధ్యక్ష పదవులకు ఎన్నిక నిర్వహించనున్నట్టు ఎస్‌ఈసీ నీలం సాహ్ని నోటిఫికేషన్‌లో పేర్కొన్నారు. 13 జిల్లాల్లోని 26 మండలాల పరిధిలో ఉన్న 26 గ్రామపంచాయతీ ఉప సర్పంచ్‌ల ఎన్నికకు ఎస్‌ఈసీ మరో నోటిఫికేషన్‌ ఇచ్చారు. మే 5వ తేదీ ఉదయం 11 గంటలకు ఉప సర్పంచ్‌ ఎన్నిక నిర్వహించనున్నట్టు ఎస్‌ఈసీ నోటిఫికేషన్‌లో స్పష్టం చేశారు.