Andhra News: ముగిసిన బొజ్జల అంత్యక్రియలు.. పాల్గొన్న చంద్రబాబు

తిరుపతి: తెదేపా నేత, సీనియర్‌ మంత్రి బొజ్జల గోపాలకృష్ణారెడ్డి అంత్యక్రియలు పూర్తయ్యాయి. తిరుపతి జిల్లా ఊరందూరులోని వ్యవసాయ క్షేత్రంలో అశేషంగా తరలివచ్చిన అభిమానుల మధ్య బొజ్జల అంత్యక్రియలు నిర్వహించారు. ప్రభుత్వ లాంఛనాలతో ఆయనకు తుది వీడ్కోలు పలికారు. బొజ్జల అంత్యక్రియల్లో తెదేపా అధినేత చంద్రబాబు పాల్గొన్నారు. ఈ సందర్భంగా బొజ్జల సతీమణిని ఆయన పరామర్శించారు.

చంద్రబాబు మాట్లాడుతూ.. ఆప్తమిత్రుడిని కోల్పోవడం బాధాకరమన్నారు. శ్రీకాళహస్తి ప్రజలు బొజ్జలను ఎన్నటీకి మరవరని చెప్పారు. రాష్ట్రాభివృద్ధిలో మంత్రిగా ఆయన కీలకపాత్ర పోషించారని కొనియాడారు. బొజ్జల స్ఫూర్తిని ఆయన కుమారుడు కొనసాగిస్తారని ఆకాంక్షిస్తున్నట్లు చంద్రబాబు చెప్పారు.