CM Jagan: పెద్ద చదువులు చదివితేనే పేదల తలరాతలు మారతాయి: సీఎం జగన్‌

అమరావతి: విద్యార్థులు ఏ విషయంలోనూ ఇబ్బందులు పడకూడదని.. పెద్ద చదువులకు పేదరికం అడ్డుకాకూడదని ఏపీ సీఎం జగన్‌ అన్నారు. అందుకే పూర్తి ఫీజు రీయింబర్స్‌మెంట్‌ అమలు చేస్తున్నామని చెప్పారు. తాడేపల్లి క్యాంపు కార్యాలయంలో ‘జగనన్న విద్యాదీవెన’ కింద పూర్తి ఫీజు రీయింబర్స్‌మెంట్ నిధులను సీఎం విడుదల చేశారు.

ఈ ఏడాది మూడో విడతగా రాష్ట్రంలోని దాదాపు 11.03లక్షల మంది విద్యార్థులకు రూ.686 కోట్ల నిధులను తల్లుల ఖాతాల్లో సీఎం జమ చేశారు. పేద విద్యార్థుల కోసమే పూర్తి ఫీజు రీయింబర్స్‌మెంట్‌ అమలు చేస్తున్నామని.. వారికి అన్నిరకాలుగా మంచి జరగాలని ఆకాంక్షించారు. పెద్ద చదువులు చదివితేనే పేదల తలరాతలు మారతాయన్నారు. విద్యార్థులను వందశాతం గ్యాడ్యుయేట్లగా నిలబెట్టడమే తమ ప్రభుత్వ లక్ష్యమని చెప్పారు.