Ap News: విలీనానికి అంగీకరించని పాఠశాలలకు గ్రాంటు నిలిపివేస్తారా?: హైకోర్టు

అమరావతి: ఆంధ్రప్రదేశ్‌లో ఎయిడెడ్‌ పాఠశాలల విలీన ప్రక్రియ పిటిషన్‌పై హైకోర్టులో విచారణ జరిగింది. ఉన్నత న్యాయస్థానం ఆదేశాల మేరకు పాఠశాల విద్యాశాఖ డైరెక్టర్‌ చినవీరభద్రుడు విచారణకు హాజరయ్యారు. విలీనానికి అంగీకరించని పాఠశాలలకు గ్రాంటు నిలిపివేస్తారా? అని విచారణ సందర్భంగా న్యాయస్థానం ప్రశ్నించింది. ఎయిడెడ్‌ పాఠశాలల విలీనంపై యాజమాన్యాలపై ఎలాంటి ఒత్తిడి తీసుకురావడం లేదని.. గ్రాంట్‌ కూడా నిలిపివేయమని చినవీరభద్రుడు కోర్టుకు వివరించారు. ఈ మేరకు 13 జిల్లాల డీఈఓలతో టెలికాన్ఫరెన్స్‌లో సూచనలు చేసినట్లు చెప్పారు. వాదనలు విన్న ధర్మాసనం విచారణను అక్టోబర్‌ 4వ తేదీకి వాయిదా వేసింది.