TS News: జేఎన్‌టీయూహెచ్‌లో స్వర్ణోత్సవాలను ప్రారంభించిన తమిళిసై

హైదరాబాద్: దేశంలోనే మొట్టమొదటి టెక్నలాజికల్‌ యూనివర్సిటీ జేఎన్‌టీయూ హైదరాబాద్‌ అని గవర్నర్ తమిళిసై సౌందర రాజన్‌ అన్నారు. దేశంలోనే జేఎన్‌టీయూహెచ్‌కు మంచి పేరుందని కితాబిచ్చారు. కూకట్‌పల్లిలోని జేఎన్‌టీయూహెచ్‌ 50వ సంవత్సరంలో అడుగుపెట్టిన సందర్భంగా నిర్వహిస్తున్న స్వర్ణోత్సవాలను ఆమె ప్రారంభించారు. ఈ సందర్భంగా స్వర్ణోత్సవ వేడుకల లోగోను ఆవిష్కరించారు. దీంతో పాటు పూర్వ విద్యార్థుల కోసం సెంటర్ భవన నిర్మాణానికి శంకుస్థాపన చేశారు. మారుతున్న సమాజానికి అనుగుణంగా విద్యార్థికి కావాల్సిన అన్ని విద్యా సౌకర్యాలు జేఎన్‌టీయూలో ఉన్నాయని గవర్నర్ తెలిపారు. జేఎన్‌టీయూ హైదరాబాద్‌కు సిరిసిల్లలో ఓ ఇంజినీరింగ్ కాలేజీ, సుల్తాన్‌పూర్‌లో ఫార్మా కళాశాల ఏర్పాటుకు అనుమతి లభించిందని ఉపకులపతి నర్సింహారెడ్డి వెల్లడించారు.