TS News: వెలిగొండ ప్రాజెక్టుకు ఏఐబీపీ నిధులా?: కేంద్రానికి తెలంగాణ ఈఎన్‌సీ లేఖ

హైదరాబాద్‌: కృష్ణా నదిపై ఏపీ ప్రభుత్వం చేపట్టిన వెలిగొండ ప్రాజెక్టుకు ప్రధానమంత్రి కృషి సంచాయీ యోజన (ఏఐబీపీ) నిధుల అంశంపై కేంద్రానికి తెలంగాణ ప్రభుత్వం ఫిర్యాదు చేసింది. ఈ మేరకు కేంద్ర జల్‌శక్తి శాఖకు తెలంగాణ ఈఎన్సీ మురళీధర్‌ లేఖ రాశారు. వెలిగొండ ప్రాజెక్టుకు కృష్ణా ట్రైబ్యునల్‌లో కేటాయింపులు లేవని.. వరద జలాల ఆధారంగా ఆ ప్రాజెక్టును చేపట్టారని పేర్కొన్నారు. వెలిగొండకు అనుమతులు లేవన్నారు. ఆ ప్రాజెక్టు ద్వారా కృష్ణా బేసిన్‌ వెలుపలకు నీరు తరలిస్తున్నారని.. ఈ అంశంపై గతంలోనే ఫిర్యాదు చేశామని పేర్కొన్నారు.

అనుమతి లేని ప్రాజెక్టుకు ఏఐబీపీ కింద నిధులివ్వడంపై ఈఎన్‌సీ అభ్యంతరం వ్యక్తం చేశారు. ఇది ఎంత వరకు సబబని లేఖలో ప్రశ్నించారు. ఏఐబీపీ కింద వెలిగొండ ప్రాజెక్టుకు నిధులు ఇచ్చే అర్హత ఉందో లేదో పునఃపరిశీలించాలని కేంద్ర జల్‌శక్తి శాఖను ఈఎన్‌సీ మురళీధర్‌ కోరారు.