Biometric‌ సమస్యలతో దూరం చెయ్యొద్దు

రేషన్‌పై కేంద్రం, రాష్ట్ర ప్రభుత్వాలకు ఎన్‌హెచ్‌ఆర్‌సీ ఆదేశం

ఈనాడు, దిల్లీ: మహమ్మారి కాలంలో లబ్ధిదారులు ఆహార ధాన్యాలకు దూరం కావొద్దని జాతీయ మానవ హక్కుల సంఘం (ఎన్‌హెచ్‌ఆర్‌సీ) అభిప్రాయపడింది. ఆధార్, రేషన్‌ కార్డులను బయోమెట్రిక్‌తో అనుసంధానించే ప్రక్రియలో సమస్యలతో దేశంలో 30.8 కోట్ల మంది ఆహార ధాన్యాలకు దూరం కాకుండా చూడాలంటూ కేంద్రం, రాష్ట్ర ప్రభుత్వాలు, కేంద్ర పాలిత ప్రాంతాలను ఎన్‌హెచ్‌ఆర్‌సీ ఆదేశించింది. బయోమెట్రిక్‌ సమస్యలతో మిజోరాంలోని ఛక్మా గ్రామ ప్రజలు ప్రధానమంత్రి గరీబ్‌ కళ్యాణ్‌ అన్న యోజన (పీఎంజీకేఏవై) కింద ఆహార ధాన్యలు పొందలేకపోతున్నారని రైట్స్‌ అండ్‌ రిస్క్‌స్‌ అనాలసిస్‌ గ్రూప్‌ డైరెక్టర్‌ సుహాస్‌ ఛక్మా ఎన్‌హెచ్‌ఆర్‌సీకి ఫిర్యాదు చేశారు. దీన్ని పరిశీలించిన ఎన్‌హెచ్‌ఆర్‌సీ కరోనా కాలంలో సాంకేతిక కారణాలతో లబ్ధిదారులు ఆహార ధాన్యాలకు దూరం కాకుండా చూడాలని   కేంద్ర, రాష్ట్ర ప్రభుత్వాలు, కేంద్ర పాలిత ప్రాంతాలను ఆదేశించింది.