Pfizer: ఫైజర్‌ బూస్టర్‌ డోసుకు ఈయూ రెగ్యులేటరీ ఓకే!

అమ్‌స్టర్‌డామ్‌: కరోనా నివారణకు 18 ఏళ్లు పైబడిన వారికి ఫైజెర్‌ టీకా బూస్టర్‌ డోసు ఇచ్చేందుకు యూరోపియన్‌ యూనియన్‌ డ్రగ్‌ రెగ్యులేటరీ పచ్చజెండా ఊపింది. నిర్దేశించిన వయసు కలిగిన వారంతా రెండో డోసు తీసుకున్న కనీసం 6 నెలలు తర్వాత బూస్టర్‌ డోసు తీసుకోవచ్చని యూరోపియన్‌ మెడిసిన్స్‌ ఏజెన్సీ తెలిపింది. రోగ నిరోధకత మరీ తక్కువగా ఉన్నవారు ఫైజర్‌-బయోఎన్‌టెక్‌ లేదా మోడెర్నా టీకాలను రెండో డోసు తీసుకున్న కనీసం 28 రోజుల తర్వాత మూడో డోసు వేసుకోవచ్చని సిఫారసు చేసింది. ఈ సిఫారసులు ఈయూలో ఉన్న 27 సభ్య దేశాలకు వెళ్లనున్నాయి. అయితే, ఇప్పటికే పలు దేశాలు బూస్టర్‌ డోసు పంపిణీని ప్రారంభించాయి.