దిల్లీ బడ్జెట్‌కు ఎట్టకేలకు కేంద్రం ఆమోదం

అనుమతి నిరాకరణతో తొలుత గందరగోళం
‘పెద్దన్న మోదీ’తో కలిసి పనిచేస్తా: కేజ్రీవాల్‌

దిల్లీ: 2023-24 సంవత్సరానికి సంబంధించి దిల్లీ ప్రభుత్వ బడ్జెట్టుకు కేంద్రం ఎట్టకేలకు ఆమోదం తెలిపింది. తొలుత ఈ ఆమోదం లభించక మంగళవారం దానిని దిల్లీ శాసనసభలో ప్రవేశపెట్టలేకపోయారు. బడ్జెట్టును అడ్డుకోవద్దంటూ ప్రధాని మోదీకి సీఎం కేజ్రీవాల్‌ లేఖ రాశారు. తర్వాత గంటల వ్యవధిలోనే కేంద్రం ఆమోదం లభించింది. వెంటనే కేజ్రీవాల్‌ స్పందిస్తూ.. నరేంద్ర మోదీతో కలిసి పనిచేయాలనుకుంటున్నానని ట్వీట్‌ చేశారు. ‘మీరు పెద్దన్న. నేను చిన్న తమ్ముడిని. నాకు మీరు మద్దతు ఇస్తే నేనూ సహకరిస్తా. చిన్నతమ్ముడి హృదయాన్ని గెలుచుకోవాలంటే ముందు అతన్ని ప్రేమించండి’ అని చెప్పారు. పోరాడి అలసిపోయామనీ, దానివల్ల ఎవరికీ ఉపయోగం లేదని అన్నారు. కేంద్రంతో పోరాటం లేకపోతే దిల్లీ పదిరెట్లు ఎక్కువగా పురోగతి సాధించి ఉండేదని చెప్పారు.