Kishan Reddy: దేశంలోని ప్రతి పర్యాటక కేంద్రంలో రామోజీ ఫిల్మ్‌సిటీ తరహా చిత్రనగరి

కిషన్‌రెడ్డి ఆకాంక్ష

శ్రీనగర్‌: పర్యాటకానికి భారత్‌ను తొలి గమ్యస్థానంగా తీర్చిదిద్దేందుకు ప్రణాళికలు రూపొందిస్తున్నట్లు కేంద్ర పర్యాటకశాఖ మంత్రి కిషన్‌రెడ్డి తెలిపారు. అందులో ఫిల్మ్‌ టూరిజం ఒకటని పేర్కొన్నారు. జమ్మూకశ్మీర్‌లోని శ్రీనగర్‌లో జరుగుతున్న మూడు రోజుల జీ-20 సమావేశాల్లో పాల్గొన్న ఆయన మంగళవారం ‘ఈటీవీ భారత్‌’తో మాట్లాడారు. నంబరు 1 ఫిల్మ్‌ సిటీ అయిన రామోజీ ఫిల్మ్‌సిటీ తన సొంతరాష్ట్రం తెలంగాణలో ఉండడం గర్వకారణమని తెలిపారు. జమ్మూకశ్మీర్‌ సహా అన్ని పర్యాటక ప్రదేశాల్లో అలాంటి ఫిల్మ్‌సిటీలు ఉండాలని ఆకాంక్షించారు. ఈ జీ-20 సదస్సు ముఖ్య ఎజెండా పర్యాటకమేనని తెలిపారు. ఈ రంగంలో ప్రైవేటు పెట్టుబడులు ముఖ్యమని, అవి లేకుండా ఇంత పెద్ద దేశంలో పర్యాటకాన్ని అభివృద్ధి చేయలేమని చెప్పారు.