చాక్లెట్‌ గణపతి!

ముంబయి: మట్టి.. పేపరు.. పలురకాల దినుసులతో వినాయక విగ్రహాలను చూశాం. ముంబయిలోని శాంతాక్రజ్‌ ప్రాంతంలో నివసిస్తున్న కమర్షియల్‌ డిజైనర్‌ రింతూ రాథోడ్‌ ఈ ఏడాది వినాయక చవితి వేడుకలకు రెండడుగుల చాక్లెట్‌ గణపతిని తయారు చేశారు. తొమ్మిది రకాల చిరుధాన్యాలను కూడా ఇందులో వాడారు. ఈ ‘వృశ్చికాసన’ వినాయకుణ్ని ఎంచక్కా తినేయవచ్చు. ‘‘ఈ ముద్ర మన పురాణాల్లో ఉంది. నేను ఇటీవలే నాచురోపతి కోర్సు పూర్తి చేశా. కాబట్టి, రెండింటినీ మిళితం చేసి ఈ భంగిమలో విగ్రహం తయారుచేశా. ఇది ‘అంతర్జాతీయ చిరుధాన్యాల సంవత్సరం’ కావడంతో కోకో (చాక్లెట్‌) పొడికి చిరుధాన్యాలు, ఎండు ఫలాల పేస్టు, బెల్లం కలిపి ఇందులో వాడా’’ అని రింతూ వివరించారు. 40 కేజీల బరువు ఉన్న ఈ విగ్రహ తయారీకి 20 గంటల సమయం పట్టింది. కరిగిపోకుండా ఏసీ గదిలో దీన్ని ఏర్పాటు చేశారు. 11వ రోజున ఈ గణపతిని పాలలో నిమజ్జనం చేసి, చాక్లెట్‌ కలిసిన పాలను స్థానికులకు, నిరుపేద పిల్లలకు పంపిణీ చేస్తామని రింతూ తెలిపారు