Bipin Rawat: స్వగ్రామంలో ఇల్లు కట్టుకుందామని..

ఊరికి ఉపకారం చేద్దామనుకున్న రావత్‌

పౌరి (ఉత్తరాఖండ్‌): జనరల్‌ బిపిన్‌ రావత్‌ చివరిసారిగా తన స్వగ్రామాన్ని 2018లో సందర్శించారు. పదవీ విరమణ తర్వాత అక్కడే సొంత ఇల్లు కట్టుకోవాలనుకున్నారు. ఈ విషయాన్ని ఆయన సమీప బంధువు భరత్‌ సింగ్‌ రావత్‌ (70) గుర్తుచేసుకున్నారు. ఇక్కడకు వచ్చినప్పుడు ఆయన తమ కుల దేవతకు పూజలు చేశారనీ చెప్పారు. ఇక్కడినుంచి ఉద్యోగరీత్యా వెళ్లడం చాలా బాధగా ఉందని, తిరిగి వచ్చాక గ్రామానికి ఎంతోకొంత చేయాలని ఉందని కూడా బిపిన్‌ రావత్‌ అప్పట్లో అన్నారని భరత్‌ సింగ్‌ రావత్‌ తెలిపారు. వచ్చే ఏడాది ఏప్రిల్‌లో మళ్లీ గ్రామానికి వస్తానన్నారని, అంతలోనే ఇలా చూడాల్సి వస్తుందనుకోలేదని కన్నీటి పర్యంతమయ్యారు.