బట్టతల బట్టబయలై.. ఆగిన పెళ్లి!

యూపీలోని ఉన్నావ్‌లో విచిత్ర ఘటన

లఖ్‌నవూ: వరుడు పెట్టుకున్న విగ్గు ఊడిపోయి బట్టతల బయటపడటంతో వివాహం అర్ధంతరంగా ఆగిపోయిన ఘటన ఉత్తర్‌ప్రదేశ్‌లోని ఉన్నావ్‌లో తాజాగా చోటుచేసుకుంది. అక్కడ పెళ్లితంతులో భాగంగా జయమాల వేడుక నిర్వహించారు. ఆపై కాసేపట్లో వివాహం జరగాల్సి ఉండగా.. ఉన్నట్టుండి వరుడు స్పృహ కోల్పోయాడు. దీంతో వధువు సోదరుడు అతడి ముఖంపై నీళ్లు చల్లాడు. కాబోయే బావను పైకి లేపేందుకు ప్రయత్నించాడు. ఈ క్రమంలో తలపాగా తీయగా.. వరుడి విగ్గు ఊడిపోయింది. అది చూసి పెళ్లికుమార్తె సహా అమ్మాయి తరఫు వారంతా అవాక్కయ్యారు. మోసంతో పెళ్లి చేసేందుకు ప్రయత్నించారని వారు ఆరోపించారు. వధువు, వరుడి కుటుంబాల మధ్య వాగ్వాదం జరిగింది. బట్టతల ఉన్న వ్యక్తిని చేసుకోనంటూ వధువు మొండికేయడంతో వివాహం ఆగిపోయింది.