సరోగసీ తల్లులకు ఆరోగ్య బీమా

దిల్లీ: సరోగసీ విధానంలో పిల్లల్ని కనాలనుకుంటున్న జంటలు ఇకపై అద్దె గర్భం దాల్చే వారికి ఆరోగ్య బీమా చేయించాల్సి ఉంటుంది. సరోగసీ తల్లులకు మూడేళ్ల పాటు ఈ కవచాన్ని అందించాలని కేంద్ర ఆరోగ్య శాఖ సూచించింది. ఈ ఏడాది జనవరి 25న ‘సరోగసీ (నియంత్రణ) చట్టం-2021’ అమలులోకి రాగా, అద్దె గర్భం దాల్చే తల్లుల ఆరోగ్య పరిరక్షణకు కేంద్ర ఆరోగ్య శాఖ ఈ నెల 21న కొన్ని విధివిధానాలను నిర్దేశించింది. ఇందులో భాగంగా గర్భిణిగా ఉన్న సమయంలోనూ, ప్రసవానంతరం ఎదురయ్యే అనారోగ్య సమస్యలకు సంబంధించిన చికిత్సల మొత్తానికి సరిపడేలా సరోగసీ తల్లులకు 36 నెలలపాటు ఆరోగ్య బీమా చేయించాలని ఈ విధానాన్ని ఎంచుకునే జంటలకు స్పష్టం చేసింది. వారి వైద్య ఖర్చులు, ఆరోగ్య సమస్యలు, జబ్బులతోపాటు మరణాలు సంభవిస్తే అందుకు సరిపడా పరిహారాన్ని చెల్లిస్తామంటూ న్యాయస్థానంలో ప్రమాణపత్రం సమర్పించాలని పేర్కొంది.