హవాలా కేసులో ఇద్దరు వ్యాపారుల అరెస్టు

దిల్లీ మంత్రి సత్యేందర్‌ జైన్‌  కేసులో ఈడీ చర్యలు

దిల్లీ: ఆమ్‌ ఆద్మీ పార్టీ(ఆప్‌) నేత, దిల్లీ ఆరోగ్య శాఖ మంత్రి సత్యేందర్‌ జైన్‌కు సంబంధించిన నగదు అక్రమ చలామణి(మనీలాండరింగ్‌) కేసులో ఇద్దరు వ్యాపారులను ఈడీ(ఎన్‌ఫోర్స్‌మెంట్‌ డైరెక్టరేట్‌) శుక్రవారం అరెస్టు చేసింది. దిల్లీకి చెందిన వ్యాపారవేత్తలు వైభవ్‌ జైన్‌, అంకుశ్‌ జైన్‌ను అదుపులోకి తీసుకున్నట్లు అధికారులు వెల్లడించారు. మే 30న అరెస్ట్‌ అయిన సత్యేందర్‌ జైన్‌ ప్రస్తుతం జ్యూడీషియల్‌ కస్టడీలో ఉన్న విషయం తెలిసిందే.

ఐటీ ప్రేమలేఖ అందింది: పవార్‌

2004, 2009, 2014, 2020 ఎన్నికల సమయంలో సమర్పించిన అఫిడవిట్లకు సంబంధించి ఆదాయపు పన్ను విభాగం నుంచి తనకు ఓ ‘ప్రేమ’ లేఖ వచ్చిందని ఎన్సీపీ అధినేత శరద్‌ పవార్‌ ట్వీట్‌ చేశారు. దీనికి సంబంధించి ఎలాంటి ఆందోళన లేదని, తగిన సమాచారమంతా తన వద్ద ఉందని తెలిపారు.