కొవాగ్జిన్‌, కొవిషీల్డ్‌ పొందిన వయోజనులకు ముందుజాగ్రత్త డోసుగా కార్బెవ్యాక్స్‌

 ఆమోదించిన కేంద్ర ఆరోగ్య మంత్రిత్వ శాఖ

దిల్లీ: తొలి రెండు టీకా డోసులుగా కొవాగ్జిన్‌ లేదా కొవిషీల్డ్‌ తీసుకున్న 18 ఏళ్లు పైబడినవారికి ముందుజాగ్రత్త డోసుగా బయోలాజికల్‌ ఈ సంస్థకు చెందిన కార్బెవ్యాక్స్‌ను వినియోగించేందుకు కేంద్ర ప్రభుత్వం ఆమోదం తెలిపిందని అధికారికవర్గాలు బుధవారం వెల్లడించాయి. ఎన్‌టాగీ (ఇమ్యునైజేషన్‌పై ఏర్పాటైన జాతీయ సాంకేతిక సలహా బృందం) కొవిడ్‌-19 వర్కింగ్‌ గ్రూప్‌ సిఫార్సు మేరకే కేంద్ర ఆరోగ్య మంత్రిత్వశాఖ ఈ నిర్ణయం తీసుకున్నట్లు తెలిపాయి. దేశంలో కొవిడ్‌-19కు సంబంధించి తొలి రెండు డోసులుగా ఒక కంపెనీ టీకా, ముందుజాగ్రత్త డోసుగా వేరే కంపెనీ టీకా వేయడానికి అనుమతించడం ఇదే తొలిసారి. తాజా నిర్ణయం కొవిడ్‌-19 పోరులో భారత ఆయుధగారాన్ని మరింత బలోపేతం చేస్తుందని పేర్కొంటూ కేంద్ర ఆరోగ్యశాఖ మంత్రి మన్‌సుఖ్‌ మాండవీయ ట్వీట్‌ చేశారు. కొత్త సౌలభ్యం ఈ నెల 12 నుంచి అందుబాటులోకి వస్తుందని తెలిపారు.