మహారాష్ట్ర సీఎం శిందే సంతకం ఫోర్జరీ.. వ్యాపారికి రూ.కోటికిపైగా టోకరా

మహారాష్ట్ర ముఖ్యమంత్రి ఏక్‌నాథ్‌ శిందే నకిలీ సంతకంతో ఇద్దరు మోసగాళ్లు ఓ వ్యాపారికి భారీగా టోకరా పెట్టారు. వ్యాపారి నుంచి విడతల వారీగా రూ.1.31 కోట్లు తీసుకున్నారు. ప్రభుత్వ ఈ-పోర్టల్‌లో భాగస్వామ్యం ఇప్పిస్తామని నమ్మించి వ్యాపారి గోపాని నుంచి నిందితులు మొదట రూ.లక్ష వసూలు చేశారు. అనంతరం విడతలవారీగా మొత్తం రూ.1.31 కోట్లు తీసుకున్నారు. ఈ క్రమంలో ఆగస్టు 25న నిందితులు ఈ-పోర్టల్‌ ఫ్రాంచైజీ కోసం లైసెన్స్‌, పర్మిట్‌, ఇతర రుసుములకు సంబంధించిన రసీదు (పేమెంట్‌ స్లిప్‌)ను గోపానికి ఇచ్చారు. ఆ రసీదులో సీఎం ఏక్‌నాథ్‌ శిందే సంతకం ఇంగ్లీష్‌లో ఉంది. సంతకంపై అనుమానం రావడంతో గోపాని.. వాలివ్‌ పోలీసులను అశ్రయించారు. కేసు నమోదు చేసుకున్న పోలీసులు నిందితుల కోసం గాలిస్తున్నారు.