Afghanistan: అఫ్గాన్‌లో ఉన్న భారతీయులు.. ప్రత్యేక విమానంలో వచ్చేయండి..!

కేంద్ర ప్రభుత్వం సూచన

కాబూల్‌: అఫ్గాన్‌లో పరిస్థితులు రోజురోజుకు దిగజారుతున్నాయి. తాలిబాన్లకు, దేశ బలగాలకు మధ్య జరుగుతున్న హింసాత్మక పోరులో సాధారణ పౌరులూ బలవుతున్నారు. తాజాగా బాల్ఖ్‌ ప్రావీన్స్‌లోని మజార్‌- ఏ- షరీఫ్‌ను లక్ష్యంగా చేసుకున్నట్లు తాలిబాన్లు ప్రకటించడంతో భారత రాయబార కార్యాలయం అప్రమత్తమైంది. ఆ ప్రాంతం, పరిసరాల్లో ఉన్న భారతీయులను వెంటనే స్వదేశానికి వెళ్లిపోవాలని సూచించింది. మంగళవారం సాయంత్రం ప్రత్యేక విమానం అందుబాటులో ఉంచినట్లు చెప్పింది. రాయబార కార్యాలయంలోని సిబ్బందీ చేరుకునే అవకాశం ఉంది. మజార్‌- ఏ- షరీఫ్‌ అఫ్గాన్‌లోని నాలుగో పెద్ద నగరం. అమెరికా తన దళాలను ఇక్కడి నుంచి ఉపసంహరిస్తున్న దరిమిలా.. తాలిబాన్లకు, దేశ సైన్యానికి మధ్య అక్కడ యుద్ధ వాతావరణం నెలకొన్న విషయం తెలిసిందే.