కశ్మీర్‌లో పోలీసులపై ఉగ్రదాడి

ఇద్దరు పోలీసులు, ఇద్దరు స్థానికుల మృతి

దిల్లీ: జమ్మూకశ్మీర్‌లో ఉగ్రవాదులు రెచ్చిపోయారు. సొపోర్‌ జిల్లాలోని అరమ్‌పొరా పోలీసు శిబిరం వద్ద సంయుక్తంగా గస్తీ నిర్వహిస్తున్న పోలీసులు, సీఆర్‌పీఎఫ్‌ జవాన్లపై శనివారం దాడికి పాల్పడ్డారు. ఈ దాడిలో ఇద్దరు పోలీసులు, ఇద్దరు స్థానికులు మృత్యువాత పడ్డారు. మరో ముగ్గురు పోలీసులకు, ఓ స్థానికుడికి గాయాలు కాగా.. వారిని సమీప ఆసుపత్రికి తరలించారు. అయితే గాయపడిన స్థానికుడి ఆరోగ్య పరిస్థితి విషమంగా ఉందని అధికారులు చెప్పారు. మరణించిన స్థానికులను సొపోర్‌లోని క్రాల్‌ తెంగ్‌కు చెందిన మంజూర్‌ అహ్మద్‌, బషీర్‌ అహ్మద్‌గా  గుర్తించినట్టు వివరించారు. ఈ దాడి వెనక లష్కరే తోయిబా ఉగ్రముఠా ఉన్నట్టు కశ్మీర్‌ ఐజీ విజయ్‌ కుమార్‌ తెలిపారు. దాడికి పాల్పడిన ఉగ్రవాదులను పట్టుకోవడానికి భద్రతా బలగాలు ఆ ప్రాంతంలో ముమ్మరంగా గాలింపు చర్యలు చేపట్టాయి.