lucknow: పోలీసు వాహనంతో రీల్స్‌... కట్‌ చేస్తే...

లఖ్‌నవూ: సామాజిక మాధ్యమాల్లో లైకులు, కామెంట్ల కోసం కొంతమంది యువత అడ్డదారులు తొక్కుతున్నారు. ఇతరులకు ఇబ్బంది కలుగుతుందనే ఆలోచన లేకుండా వీడియోలు, రీల్స్‌ చేయడానికి రోడ్లు, మెట్రోలు, ఆసుపత్రులు అన్నింటినీ వాడేస్తున్నారు. ఉత్తర్‌ప్రదేశ్‌లోని ఓ యువకుడు ఇన్‌స్టా రీల్‌ చేయడానికి ఏకంగా పోలీసు జీప్‌నే వాడటంతో ఇబ్బందుల్లో పడ్డాడు. 

ఉత్తర్‌ప్రదేశ్‌ గాజియాబాద్‌లోని ఇందిరాపురంలో పోలీసులు తమ వాహనాన్ని నిలిపి ఉంచి ట్రాఫిక్‌ను క్లియర్‌ చేస్తున్నారు. అక్కడే ఉన్న మొయిన్‌ ఖురేషీ అనే యువకుడు దీనిని అవకాశంగా తీసుకొని రీల్‌ చేయడానికి పోలీసు జీపును ఉపయోగించుకున్నాడు. సూట్ ధరించి పోలీసు వాహనం నుంచి దిగుతూ, ఎనర్జీ డ్రింక్‌ తాగుతూ రీల్‌ చేశాడు. దానికి బ్యాక్‌గ్రౌండ్‌ సాంగ్‌ జత చేసి ఇన్‌స్టాలో పోస్ట్‌ చేయడంతో అది వైరలైంది. ఈ వీడియో పోలీసుల దృష్టికి రావడంతో వారు ఆ యువకుడిని అరెస్టు చేశారు. ఇన్‌స్టా నుంచి వైరల్‌ వీడియో తొలగించామని పోలీసు అధికారి తెలిపారు.