India Corona: కొనసాగుతోన్న వ్యాప్తి.. 8 వేలు దాటిన కొత్త కేసులు..!

40 వేల పైనే బాధితుల సంఖ్య 

దిల్లీ: దేశంలో కరోనా వైరస్ క్రమంగా విస్తరిస్తోంది. తాజాగా కొత్త కేసులు 8 వేలకు పైగా వెలుగుచూశాయి. ప్రస్తుతం మహారాష్ట్ర, కేరళ, దిల్లీ, కర్ణాటక, హరియాణాలో మహమ్మారి విజృంభిస్తోంది. దాంతో క్రియాశీల కేసులు 40 వేల మార్కును దాటేశాయి. శనివారం కేంద్ర ఆరోగ్య శాఖ వెల్లడించిన గణాంకాల ప్రకారం...

శుక్రవారం 3.44 లక్షల మందికి వైద్య పరీక్షలు నిర్వహించగా.. 8,329 మందికి వైరస్ పాజిటివ్‌గా తేలింది. 103 రోజుల తర్వాత ఈ స్థాయి వ్యాప్తి కనిపించింది. పాజిటివిటీ రేటు వరుసగా మూడోరోజు రెండు శాతం(2.41 శాతం) పైనే నమోదైంది. మహారాష్ట్రలో 3,081 మందికి కరోనా సోకగా.. ఒక్క ముంబయిలోనే ఆ సంఖ్య 1,956గా ఉంది. దాంతో ఆ నగరంలో పాజిటివిటీ రేటు 12.74 శాతానికి చేరి, ప్రమాద ఘంటికలు మోగిస్తోంది. కేరళలో 2,415, దిల్లీలో 655 మంది వైరస్ బారినపడ్డారు. 2020 ప్రారంభం నుంచి 4.32 కోట్లకు పైగా కొవిడ్ కేసులొచ్చాయి. 

* తాజా విజృంభణతో బాధితుల సంఖ్య గణనీయంగా పెరుగుతోంది. ప్రస్తుతం వైరస్‌తో బాధపడుతున్న వారి సంఖ్య(క్రియాశీల కేసులు)40,370కి చేరింది. మొత్తం కేసుల్లో ఆ వాటా 0.09 శాతంగా నమోదైంది. 

* 24 గంటల వ్యవధిలో 4,216 మంది కొవిడ్ నుంచి కోలుకున్నారు. దేశంలో రికవరీ రేటు 98.69 శాతానికి పడిపోయింది. నిన్న 10 మంది మరణించారు.  

* నిన్న 15.08 లక్షల మంది టీకా తీసుకోగా.. ఇప్పటివరకూ 194.9 కోట్లకు పైగా డోసులు పంపిణీ అయ్యాయని కేంద్రం తెలిపింది.