Marriage: ప్రేమిస్తున్న యువకుడితో భార్యకు దగ్గరుండి ప్రేమ వివాహం

కట్టుకున్న భార్య తనతో సంతోషంగా ఉండటం లేదని తెలుసుకున్న ఓ భర్త.. ఆమెకు రెండో పెళ్లి చేశాడు. ప్రేమిస్తున్న యువకుడితో వివాహం జరిపించాడు. ఈ ఘటన ఉత్తర్‌ప్రదేశ్‌లో చోటుచేసుకుంది. కాన్పుర్‌కు చెందిన కోమల్‌- పంకజ్‌లకు ఆరు నెలల క్రితం వివాహమైంది. పేరుకే పెళ్లి తప్ప.. అప్పటి నుంచి ఇద్దరి మధ్య ఎలాంటి అనురాగం లేదు. దీంతో అసలు సమస్యేంటని భార్యను ఆరా తీశాడు పంకజ్‌. ‘నీ సంతోషం కోసం ఏదైనా చేస్తాను’ అని మాటిచ్చాడు. దీంతో కోమల్‌ అసలు విషయం చెప్పేసింది. పింటు అనే వ్యక్తితో ప్రేమలో ఉన్నట్లు తెలిపింది. తన కుటుంబ సభ్యులు బలవంతంగా ఈ వివాహం జరిపించారని వివరించింది. పింటుతో ఉంటేనే సుఖంగా ఉంటానని చెప్పింది. ఇదంతా విన్న పంకజ్‌.. కోపగించుకోలేదు. ప్రశాంతంగా సరేనన్నాడు. ముందుగా తన కుటుంబ సభ్యులను పిలిచి మాట్లాడాడు. పద్ధతి ప్రకారం భార్యకు విడాకులు ఇచ్చాడు. ఆ తర్వాత పింటు, కోమల్‌కు వివాహం జరిపించాడు. ఈ వివాహం స్థానికంగా చర్చనీయాంశమైంది.