Education: ఎంత ఎక్కువ చదివితే అంత ఆదాయం

దిల్లీ: ఉన్నత విద్యావంతుల్ని సంతోషపెట్టే విషయమిది. భారత్‌లో ఎంత ఎక్కువ చదువుకుంటే సంపాదన అంతగా పెరుగుతోందని ‘పాపులేషన్‌ ఫౌండేషన్‌ ఆఫ్‌ ఇండియా’ అనే ఎన్జీవో చేసిన అధ్యయనంలో వెల్లడైంది. యువ జనాభా ఆరోగ్యం, విద్య, సంక్షేమంపై ప్రభుత్వం ఎందుకు పెట్టుబడులు పెట్టాలో వివరించింది. ఈ నివేదికను ప్రధానమంత్రి ఆర్థిక సలహా మండలి ఛైర్మన్‌ వివేక్‌ దెబ్రాయ్‌ సోమవారం విడుదల చేశారు. ప్రతి అదనపు విద్యా సంవత్సరం.. వ్యక్తి సగటు ఆదాయాన్ని సుమారు 6.7% పెంచుతున్నట్టు ఈ అధ్యయనం పేర్కొంది. ఈ రాబడి అబ్బాయిల కంటే అమ్మాయిలకు ఎక్కువగా ఉంటోంది. అదనంగా చదివే ప్రతి సంవత్సరం.. మహిళల నెలవారీ జీతాన్ని 8.6% పెంచుతుంటే, పురుషులకు 6.1% మేర పెరుగుతోంది. పాఠశాల విద్యపై పెట్టే ప్రతి రూపాయికి.. భవిష్యత్తులో ఒక్కో వ్యక్తికి రూ.4.5- రూ.8.2 మేర ఆర్థిక ప్రయోజనాల రూపంలో ప్రతిఫలం వచ్చే అవకాశం ఉంది. వచ్చే ఆరేళ్లలో కౌమార దశలో ఉన్నవారి మానసిక ఆరోగ్యం పెంచే వసతుల కల్పనకు రూ.8,134 కోట్లు ఖర్చవుతుందని కూడా ఈ అధ్యయనం తెలిపింది. అలాగే మానసిక రుగ్మతల చికిత్సకు రూ.2,745 కోట్ల వ్యయమవుతుందని చెప్పింది. యుక్తవయస్కులు ఎదుర్కొనే మానసిక సమస్యలే మున్ముందు ప్రధాన సమస్య అవుతుందని వివేక్‌ దెబ్రాయ్‌ ఈ సందర్భంగా పేర్కొన్నారు.