కథ కుదిరిందా?

‘జాతిరత్నాలు’ లాంటి విజయం తర్వాత నవీన్‌ పొలిశెట్టి చేయనున్న కొత్త చిత్రమేదన్నది ఇంత వరకు స్పష్టత రాలేదు. నటి అనుష్కతో కలిసి ఓ సినిమా చేయనున్నట్లు వార్తలొచ్చినా.. అది కార్యరూపం దాల్చలేదు. ప్రస్తుతం సినీ వర్గాల నుంచి అందుతున్న సమాచారం ప్రకారం.. నవీన్‌ తదుపరి చిత్రం సితార ఎంటర్‌టైన్‌మెంట్స్‌లో ఖరారైనట్లు తెలుస్తోంది. ఈ సినిమాతో కల్యాణ్‌ శంకర్‌ అనే ఓ కొత్త దర్శకుడు తెరకు పరిచయం కానున్నారని సమాచారం. కల్యాణ్‌ ఇటీవలే నవీన్‌కు ఓ కథ వినిపించారని, ఆ కథాంశం విభిన్నంగా ఉండటంతో సినిమా చేసేందుకు అంగీకరించారని తెలిసింది. ప్రస్తుతం స్క్రిప్ట్‌ పనులు జరుగుతున్నాయని, త్వరలో సినిమా పట్టాలెక్కించనున్నారని సమాచారం.