‘వావ్‌’ ఓజా.. జ్వాల.. ద్రోణవల్లి హారిక

హైదరాబాద్: ‘వావ్’ చరిత్రలో మొదటిసారిగా క్రీడాకారులు రావటం విశేషంగా ప్రేక్షకులకు కనువిందు చేస్తోంది. సాయికుమార్ వ్యాఖ్యాతగా ఈటీవీలో ప్రసారమవుతున్న గేమ్ షో ‘వావ్-3’. పలు క్రీడలలో ప్రతిభ కనబరుస్తూ ఎంతో మంది అభిమానులను సంపాదించుకున్న ప్రజ్ఞాన్‌ ఓజా, గుత్తా జ్వాల, మధు శాలిని, ద్రోణవల్లి హారిక తాజాగా ఈ గేమ్ షోలో పాల్గొని సందడి చేశారు. దీనికి సంబంధించిన ప్రోమో ప్రేక్షకులను ఎంతగానో ఆకట్టుకుంటోంది.

షోలో భాగంగా ‘ఏది నీ బెస్ట్ వికెట్’ అని ఓజాను సాయికుమార్ అడుగగా.. ‘అది క్రిస్‌ గేల్. ఎందుకంటే ఆయన ఛాలెంజ్‌ చేశాడు సర్’ అని చెప్పారు. అలాగే ‘బాహుబలి చిత్రాన్ని ఎన్ని సార్లు చూసుంటారు’ అని జ్వాలను సాయికుమార్ ప్రశ్నించగా.. ‘చాలా సార్లు’ అనగా.. దానికి ఓజా అందుకొని ‘సర్‌ అడిగింది.. సినిమాను ఎన్ని సార్లు చూశావని.. అంతే కానీ ప్రభాస్‌ను ఎన్ని సార్లు చూశావని కాదు’ అంటూ సరదాగా ఆమెను ఆటపట్టించారు. అదే విధంగా ‘అపరిచితుడు క్యారెక్టర్ ఏ గ్రంథం ఆధారంగా తప్పులు చేసిన వారికి శిక్షలు విధిస్తుంటాడు’ అని సాయికుమార్ అడుగగా...  ఓజా సరదాగా పంచులతో నవ్వులు పూయించారు. ఈ నవ్వుల హంగామాను వీక్షించాలంటే వచ్చే మంగళవారం (జనవరి 5) రాత్రి ప్రసారం కానున్న ‘వావ్-3’ కార్యక్రమాన్ని చూడాల్సిందే.. అప్పటివరకు ఈ ప్రోమోను చూసేయండి..!