Biggboss 15: బిగ్‌బాస్‌ టైటిల్‌ విన్నర్‌.. ఎంత డబ్బు గెలుచుకున్నారంటే..?

ముంబయి: బాలీవుడ్‌ స్టార్‌హీరో సల్మాన్‌ఖాన్‌ వ్యాఖ్యాతగా వ్యవహరించిన ‘బిగ్‌బాస్‌ సీజన్‌-15’ ఆదివారంతో ముగిసింది. బుల్లితెర, వెండితెరకు చెందిన 24 మంది సెలబ్రిటీలతో సుమారు 120 రోజులపాటు ఈ కార్యక్రమం విజయవంతంగా కొనసాగింది. బుల్లితెర నటి తేజస్వీ ప్రకాశ్‌ చివరికి ‘బిగ్‌బాస్‌ 15’ టైటిల్‌ని ముద్దాడింది. తనకు ఈ విజయాన్ని అందించిన అభిమానులందరికీ ఆమె ధన్యవాదాలు తెలిపారు. విజేతగా నిలిచిన ఆమె ‘బిగ్‌బాస్‌-15’ ట్రోఫీతోపాటు క్యాష్‌ప్రైజ్‌గా రూ.40 లక్షలు అందుకున్నారు.

అంతేకాకుండా విశేష ప్రేక్షకాదరణ పొందిన హిందీ సీరియల్‌ ‘నాగిని’ తదుపరి సీక్వెల్‌లో(నాగిని-6) నటించే అవకాశాన్ని చేజిక్కించుకున్నారు. ఆమె విజయం పట్ల పలువురు బుల్లితెర నటులు శుభాకాంక్షలు చెబుతూ పోస్టులు పెడుతున్నారు. 2015లో వచ్చిన ‘స్వరాగిణి’ ధారావాహికతో తేజస్వీ బుల్లితెర ప్రేక్షకులకు చేరువయ్యారు. ఈ సీరియల్‌ హిట్‌ అయ్యాక ఆమె పలు ధారావాహికలు, రియాల్టీ షోలలో అవకాశాలు దక్కించుకున్నారు.