Hanuman: అక్కడ ‘సలార్‌’ రికార్డు బ్రేక్‌ చేసిన ‘హనుమాన్‌’.. టాప్‌ 10 జాబితాలో స్థానం

ఇంటర్నెట్‌ డెస్క్‌: చిన్న సినిమాగా విడుదలైన ‘హనుమాన్‌’ సంచలనం సృష్టిస్తోంది. విడుదలైన అన్ని చోట్ల పాజిటివ్‌ టాక్‌ను సొంతం చేసుకోవడంతో థియేటర్ల వద్ద హౌస్‌ఫుల్ బోర్డులు దర్శనమిస్తున్నాయి. తాజాగా ఇది ఓవర్సీస్‌లో పెద్ద సినిమాల రికార్డులను బ్రేక్‌ చేసింది. నార్త్‌ అమెరికాలో నాలుగు రోజుల్లోనే 3 మిలియన్ల డాలర్లకు పైగా వసూళ్లు రాబట్టింది. అక్కడ అత్యధిక వసూళ్లు సాధించిన తెలుగు సినిమాల జాబితాలో టాప్‌ 10లో స్థానం దక్కించుకుంది. అలాగే, నార్త్‌ అమెరికాలో మొదటి వీకెండ్‌ కలెక్షన్లలో ఈ చిత్రం ‘సలార్‌’, ‘బాహుబలి’ రికార్డులను దాటేసింది.

ఈ వారం థియేటర్‌లో కొత్త సినిమాల్లేవ్‌... ఓటీటీలో ఏకంగా 22 చిత్రాలు/సిరీస్‌లు

ఇప్పటివరకు ఈ చిత్రం ప్రపంచవ్యాప్తంగా రూ.100కోట్లు వసూలు చేసింది. ఈ పోస్టర్‌ను షేర్ చేసిన దర్శకుడు ‘రూ.100 కోట్ల క్లబ్‌లో చేరిన మొదటి సినిమా’ అంటూ ఆనందం వ్యక్తం చేశారు. ఈసందర్భంగా ప్రేక్షకులందరికీ కృతజ్ఞతలు చెప్పారు. మరోవైపు ‘హనుమాన్‌’పై ప్రముఖులు ప్రశంసలు కురిపిస్తున్నారు. ఈ సినిమా చూసిన చిరంజీవి.. తనను అభినందిస్తూ మెసేజ్‌ పెట్టినట్లు తేజ సజ్జ ఇటీవల తెలిపారు. తాజాగా రామ్ పోతినేని ఈ చిత్రబృందానికి శుభాకాంక్షలు చెప్పారు. ప్రస్తుతం ఎక్కడ చూసిన ‘హనుమాన్‌’ హవానే కనిపిస్తుందన్నారు. ‘మీ శ్రమకు తగ్గ ఫలితం దక్కింది. ప్రశాంత్‌ వర్మ తన విజన్‌తో అద్భుతాన్ని సృష్టించారు. ఈ సక్సెస్‌కు మీరంతా అర్హులు’ అని నటి రాధిక ఎక్స్‌లో పేర్కొన్నారు. ప్రశాంత్‌ వర్మ దర్శకత్వంలో సంక్రాంతి కానుకగా ప్రేక్షకుల ముందుకువచ్చిన ఈ చిత్రంలో హనుమంతు పాత్రలో తేజ సజ్జ ఆకట్టుకుంటున్నారు. సూపర్‌ హీరో కథను ఇతిహాసంతో ముడిపెట్టి.. నేటివిటీ మిస్‌ కాకుండా చూపించడంతో ప్రేక్షకులు దీనికి క్యూ కడుతున్నారు.