Nikhil: ‘స్పై’.. యాక్షన్‌ షురూ

నిఖిల్‌ హీరోగా నటిస్తున్న తొలి పాన్‌ ఇండియా చిత్రం ‘స్పై’. ఎడిటర్‌ గ్యారీ బిహెచ్‌ ఈ సినిమాతో దర్శకుడిగా పరిచయమవుతున్నారు. కె.రాజ శేఖర్‌ రెడ్డి నిర్మిస్తున్నారు. ఐశ్వర్య మేనన్‌ కథానాయిక. ఈ సినిమా ప్రస్తుతం శరవేగంగా చిత్రీకరణ జరుపుకొంటోంది. ఇందులో భాగంగా హాలీవుడ్‌ స్టంట్‌ డైరెక్టర్‌ లీ విటేకర్‌ ఆధ్వర్యంలో భారీ యాక్షన్‌ ఎపిసోడ్స్‌ తెరకెక్కిస్తున్నారు. ఈ విషయాన్ని చిత్ర బృందం శనివారం సామాజిక మాధ్యమాల ద్వారా వెల్లడించింది. ఈ సందర్భంగా సెట్లో దిగిన ఓ ఫొటోను నెట్టింట పంచుకున్నారు. ఆ ఫొటోలో నిఖిల్‌, ఐశ్వర్య, ఇతర నటీనటులతో పాటు హాలీవుడ్‌ సినిమాటోగ్రాఫర్‌ జూలియన్‌ ఎస్ట్రాడా, బాలీవుడ్‌ ఛాయాగ్రాహకుడు కైకో నకహరా కనిపించారు. ‘‘ఈ చిత్రాన్ని పూర్తి యాక్షన్‌ స్పై థ్రిల్లర్‌గా భారీ స్థాయిలో రూపొందిస్తున్నాం. నిఖిల్‌ సరికొత్త లుక్‌తో.. భిన్నమైన పాత్రలో కనిపించనున్నారు. ఈ ఏడాది దసరాకు సినిమాని విడుదల చేసేందుకు సన్నాహాలు చేస్తున్నాం’’ అని చిత్ర వర్గాలు తెలిపాయి. మకరంద్‌ దేశ్‌పాండే, సన్యా ఠాకూర్‌, జిషు సేన్‌ గుప్తా కీలక పాత్రలు పోషిస్తున్నారు. శ్రీచరణ్‌ పాకాల స్వరాలందిస్తున్నారు. జూలియన్‌ ఎస్ట్రాడా ఛాయాగ్రాహకుడు.