Andhra News: జేసీ ప్రభాకర్‌రెడ్డి ముఖ్య అనుచరుడిపై హత్యాయత్నం

తాడిపత్రి: అనంతపురం జిల్లా తాడిపత్రి మాజీ ఎమ్మెల్యే, మున్సిపల్‌ ఛైర్మన్‌ జేసీ ప్రభాకర్‌రెడ్డి ముఖ్య అనుచరుడు, ఐటీడీపీ పట్టణాధ్యక్షుడు గండికోట కార్తీక్‌పై హత్యాయత్నం జరిగింది. విధులు ముగించుకుని ఇంటికి వెళ్తుండగా ఆదివారం అర్ధరాత్రి దాటిన తర్వాత కొంతమంది యువకులు ఆయనపై హత్యాయత్నం చేశారు. దీంతో కార్తీక్‌కు తీవ్ర గాయాలయ్యాయి. తాను వెళ్తున్న మార్గంలో కాపు కాసి కత్తులు, కర్రలతో దాడి చేశారని బాధితుడు తెలిపారు. తాడిపత్రిలో ప్రథమ చికిత్స అందించిన అనంతరం మెరుగైన చికిత్స కోసం అనంతపురం ఆస్పత్రికి తరలించారు. ఇటీవల కాలంలో రాష్ట్ర ప్రభుత్వ వైఫల్యాలను ఎండగడుతూ సోషల్‌ మీడియాలో పోస్టులు పెడుతున్నామనే నెపంతో వైకాపాకు చెందిన వారే ఈ దాడికి పాల్పడ్డారని కార్తీక్ ఆరోపించారు.