Cm Jagan: కేసుల ద్వారా అభివృద్ధిని అడ్డుకునేందుకు ప్రతిపక్షాల కుట్రలు: సీఎం జగన్‌

అమరావతి: ఆంధ్రప్రదేశ్‌లో చురుగ్గా రోడ్ల మరమ్మతులు జరుగుతున్నాయని ఏపీ సీఎం వైఎస్‌ జగన్‌ అన్నారు. నాడు-నేడు ద్వారా చేపట్టే పనుల్లో పురోగతి కనిపిస్తోందని వెల్లడించారు. రాష్ట్ర వ్యా్ప్తంగా రోడ్ల నిర్మాణం, మరమ్మతు పనులపై సంబంధిత అధికారులతో సీఎం జగన్‌ సమీక్ష నిర్వహించారు. అసంపూర్తిగా ఉన్న రోడ్లు, వంతెనలు, ఆర్‌వోబీలను వెంటనే పూర్తి చేయాలని అధికారులను ఆదేశించారు. తుపాను బాధిత ప్రాంతాల్లోనూ వెంటనే పనులు చేపట్టాలని చెప్పారు. పంచాయతీరాజ్‌ రోడ్ల మరమ్మతులు, రోడ్ల నిర్మాణంపై దృష్టి పెట్టాలన్నారు. జులై 15 నాటికి గుంతలు పూడ్చాలని.. 20న ఫొటో గ్యాలరీలు పెట్టాలని అధికారులను ఆదేశించారు. మరోవైపు రాష్ట్రంలో అభివృద్ధి పనులు జరగనీయకుండా ప్రతిపక్షాలు కుట్రలు చేస్తున్నాయని సీఎం జగన్‌ మండిపడ్డారు. కేంద్రం నుంచి సాయం, రుణాలు అందకుండా, కేసుల ద్వారా అడ్డుకునేందుకు ప్రయత్నిస్తున్నారని జగన్‌ విమర్శించారు.