మోదీకి రాజ్యాంగ ప్రతి పంపిన కాంగ్రెస్‌

దిల్లీ: పౌరసత్వ సవరణ చట్టానికి (సీఏఏ)కి వ్యతిరేకంగా ఆందోళన చేస్తున్న కాంగ్రెస్‌ పార్టీ తాజాగా ప్రధాని మోదీకి రాజ్యాంగ ప్రతిని పంపింది. 71వ గణతంత్ర దినోత్సవం సందర్భంగా ఈ పుస్తకాన్ని పంపి.. దేశాన్ని విభజించే ముందు ఓ సారి చదువుకోండి అంటూ ట్వీట్‌ చేసింది. ఈ మేరకు ఆదివారం ఆ పార్టీ వరుస ట్వీట్లు చేసింది. అందులో ఆ పార్టీ నేతలు సోనియాగాంధీ, మన్మోహన్‌సింగ్‌, రాహుల్‌ గాంధీ, ప్రియాంక గాంధీ వాద్రా రాజ్యాంగ ప్రవేశిక చదువుతున్న వీడియోలను ఉంచింది. వాటితో పాటు అమెజాన్‌లో కొనుగోలు చేసిన రాజ్యాంగ ప్రతికి సంబంధించి స్క్రీన్‌షాట్‌ను కూడా జోడించింది.

‘ప్రధాని మోదీజి ఈ ప్రతి త్వరలోనే మీకు చేరుతుంది. మీరు దేశాన్ని విభజించాలని యోచించే ముందు దీన్ని ఓ సారి చదవండి. ఇట్లు కాంగ్రెస్‌ పార్టీ’’ అని ట్వీట్‌ చేసింది. భారత రాజ్యాంగంలోని ఆర్టికల్‌ 14 ప్రకారం అందరూ సమానేమనన్న భావనను భారతీయ జనతా పార్టీ అర్థం చేసుకోలేకపోతోందని కాంగ్రెస్‌ పార్టీ విమర్శించింది. పౌరసత్వ సవరణ చట్టం ద్వారా ఆ పార్టీ రాజ్యాంగాన్ని ఉల్లంఘిస్తోందని ఆరోపించింది. వ్యక్తులపై వివక్ష చూపుతూ రూపొందించే చట్టాలు ఏవైనా రాజ్యాంగ విరుద్ధమని పేర్కొంది.