అభివృద్ధి జరిగిందనే దశాబ్ది సంబురాలు

ఎడపల్లి, న్యూస్‌టుడే: ప్రతి గడపకు భారాస ప్రభుత్వ పథకాలు అందుతున్నాయని, రాష్ట్రంలో అభివృద్ధి జరిగిందనే దశాబ్ది సంబురాలు నిర్వహిస్తున్నామని ఎమ్మెల్సీ కవిత స్పష్టంచేశారు. నిజామాబాద్‌ జిల్లా ఎడపల్లిలో గురువారం నిర్వహించిన ఊరూరా చెరువుల పండగ కార్యక్రమానికి బోధన్‌ ఎమ్మెల్యే షకీల్‌తో కలిసి హాజరయ్యారు. ఈ సందర్భంగా ఆమె మాట్లాడుతూ... ‘‘బోధన్‌ నియోజకవర్గ అభివృద్ధి నా బాధ్యత. పదేళ్ల క్రితం మంత్రిగా ఉన్న సుదర్శన్‌రెడ్డికి తన సొంతూరు సిరన్‌పల్లి ప్రజలకూ పింఛన్లు ఇప్పించే అవకాశం ఉండేది కాదు. ప్రస్తుతం దరఖాస్తు చేసుకొంటే చాలు పింఛన్లు మంజూరు అవుతున్నాయి.  రాష్ట్రంలోని 47 వేల చెరువులను బాగు చేయించాం. ఫలితంగా గ్రామాలకు పూర్వ వైభవం వచ్చి 4లక్షల మందికి ఉపాధి దొరుకుతోంది. కాళేశ్వరం ప్రాజెక్టు ద్వారా 20 వేల చెరువులకు నీరందిస్తున్నాం’’ అని వివరించారు. కార్యక్రమంలో నిజామాబాద్‌ జడ్పీ ఛైర్మన్‌ దాదన్నగారి విఠల్‌రావు, వైస్‌ ఛైర్‌పర్సన్‌ రజితాయాదవ్‌, భారాస నాయకులు పాల్గొన్నారు.