వైకాపాను వీడి తెదేపాలో చేరిన వారిపై కేసులా?

అచ్చెన్నాయుడు

ఈనాడు డిజిటల్‌, అమరావతి: వైకాపాను వీడి తెదేపాలో చేరిన వారిపై సీఎం జగన్‌రెడ్డి, ఆ పార్టీ నేతలు కక్షసాధింపు చర్యలకు పాల్పడటం దుర్మార్గమని తెదేపా రాష్ట్ర అధ్యక్షుడు కింజరాపు అచ్చెన్నాయుడు ధ్వజమెత్తారు. పార్టీ మారితే అక్రమంగా కేసులు పెడతారా అని శుక్రవారం ఓ ప్రకటనలో ప్రశ్నించారు. ‘‘రాజంపేటకు చెందిన వైకాపా రైతు నాయకుడు మద్దిరెడ్డి కొండ్రెడ్డి  ఏప్రిల్‌ 29న తెదేపాలో చేరారు. నాటి నుంచి వైకాపా వాళ్లు ఆయన్ను వేధిస్తున్నారు. చంద్రగిరి, మదనపల్లె స్టేషన్లలో అక్రమ కేసులు బనాయించడమే కాకుండా వైకాపా గూండాలు ఆయన ఇంటిపై దాడికి పాల్పడ్డారు. ఈ అరాచక విధానాన్ని తీవ్రంగా ఖండిస్తున్నాం’’ అని కింజరాపు అచ్చెన్నాయుడు పేర్కొన్నారు.