రాయచూర్‌పై కేసీఆర్‌ వ్యాఖ్యలు సరికాదు

కర్ణాటక మంత్రి శంకర్‌ బి.పాటిల్‌

బెంగళూరు: తెరాస ప్రభుత్వం అమలుచేస్తున్న సంక్షేమ పథకాలు చూసి, పొరుగునున్న రాయచూరు జిల్లావాసులు తమను తెలంగాణలో కలపాలని కోరుతున్నట్లు ఆ రాష్ట్ర ముఖ్యమంత్రి కేసీఆర్‌ చేసిన వ్యాఖ్యలు రాజకీయ ప్రేరేపితమని కర్ణాటక జౌళిశాఖ మంత్రి శంకర్‌ బి.పాటిల్‌ విమర్శించారు. బుధవారం పార్టీ సమావేశంలో మాట్లాడుతూ కేసీఆర్‌ ఈ వ్యాఖ్యలు చేశారు. ‘యాద్గిర్‌, రాయచూర్‌లను మేము ప్రాధాన్య జిల్లాలుగా గుర్తించి అభివృద్ధికి బోలెడు నిధులు కేటాయిస్తున్నాం. ఈ విషయాన్ని దృష్టిలో పెట్టుకొని కేసీఆర్‌ ఆ వ్యాఖ్యలు చేసి ఉంటారు. ఇంతకుమించి దీనిపై స్పందించడానికి ఏమీలేదు’ అని గురువారం పాటిల్‌ వ్యాఖ్యానించారు.