కక్షపూరిత రాజకీయాలు సరికాదు

కేంద్ర సహాయ మంత్రి రాజీవ్‌ చంద్రశేఖర్‌

ఈటీవీ, ఖమ్మం: ప్రజాస్వామ్య దేశంలో కక్షపూరిత రాజకీయాలు తగవని కేంద్ర ఐటీ, స్కిల్‌ డెవలప్‌మెంట్‌ శాఖ సహాయ మంత్రి రాజీవ్‌ చంద్రశేఖర్‌ అన్నారు. ఆత్మహత్యకు పాల్పడ్డ భాజపా నాయకుడు సాయిగణేశ్‌ కుటుంబసభ్యులను బుధవారం ఆయన పరామర్శించారు. మృతుడి అమ్మమ్మ సావిత్రి, సోదరి కావేరిలకు ధైర్యం చెప్పారు. అనంతరం విలేకరుల సమావేశంలో మాట్లాడుతూ సాయిగణేశ్‌ ఆత్మహత్య ఘటనపై పూర్తి దర్యాప్తు జరిపి.. బాధిత కుటుంబానికి న్యాయం చేయాలని డిమాండ్‌ చేశారు. అంతకుముందు బాధిత కుటుంబాన్ని హుజురాబాద్‌ ఎమ్మెల్యే ఈటల రాజేందర్‌ పరామర్శించారు. పార్టీ అండగా ఉంటుందని భరోసా ఇచ్చారు.

భాజపా శ్రేణుల నిరసన ఉద్రిక్తం

సాయిగణేశ్‌ ఆత్మహత్యకు బాధ్యులైన వారిని గుర్తించి, చట్ట ప్రకారం శిక్షించాలని డిమాండ్‌ చేస్తూ భాజపా శ్రేణులు బుధవారం ఖమ్మంలో చేపట్టిన నిరసన ఉద్రిక్తంగా మారింది. జడ్పీ సెంటర్‌లో ప్రదర్శన చేపట్టగా పోలీసులు అడ్డుకోవడంతో తోపులాట జరిగింది. భాజపా కార్యకర్తలను పోలీసులు బలవంతంగా అదుపులోకి తీసుకుని వ్యాన్‌లు ఎక్కించి ఒకటో పట్టణ ఠాణాకు తరలించారు.