Karnataka: అసెంబ్లీని కుదిపేసిన.. ఆర్టీసీ డ్రైవర్‌ ఆత్మహత్యాయత్నం ఘటన

బెంగళూరు: కర్ణాటకలోని (Karnataka) నాగమంగళ డిపోకు చెందిన ఆర్టీసీ డ్రైవర్‌ ఆత్మహత్యాయత్నానికి పాల్పడటం గురువారం ఆ రాష్ట్ర అసెంబ్లీని కుదిపేసింది. వ్యవసాయశాఖ మంత్రి చలువరాయస్వామి (Chaluvarayaswamy)ని కేబినెట్‌ నుంచి తొలగించాల్సిందిగా ప్రతిపక్షాలు డిమాండ్‌ చేశాయి. రాజకీయ కక్ష సాధింపు చర్యల్లో భాగంగానే మంత్రి.. అతడిని బదిలీ చేయించారంటూ మాజీ ముఖ్యమంత్రి కుమారస్వామి తీవ్ర స్థాయిలో ధ్వజమెత్తారు. ప్రతిపక్షాల వ్యాఖ్యలను సిద్ధరామయ్య ఖండించారు. బదిలీలు సాధారణమేనని, దానికి రాజకీయ రంగుపులమడం సరికాదన్నారు. సమస్యను పరిష్కరిస్తామని హామీ ఇచ్చారు. 

ఆర్టీసీ డ్రైవర్‌ జగదీశను నాగమంగళ డిపో నుంచి ముద్దూరు డిపోకు అత్యవసరంగా బదిలీ చేస్తూ ఆర్టీసీ అధికారులు ఇటీవల నిర్ణయం తీసుకున్నారు. ఆయన ఉన్నతాధికారులను సంప్రదించగా.. అతడిపై ఫిర్యాదులు ఉన్నాయని, పై నుంచి ఆదేశాలు రావడంతోనే బదిలీచేయాల్సి వచ్చిందని చెప్పారు. దీంతో మనస్తాపానికి గురైన జగదీశ తన మృతికి వ్యవసాయశాఖ మంత్రి చలువరాయస్వామి కారణమంటూ సూసైడ్‌ నోట్‌ రాసి ఆత్మహత్యాయత్నానికి పాల్పడ్డాడు. కుటుంబ సభ్యులు సకాలంలో గుర్తించి ఆయన్ను మైసూరులోని ఓ ఆస్పత్రిలో చేర్పించారు.

ఆస్పత్రిలో చికిత్స పొందుతున్న డ్రైవర్‌ జగదీశను ఇవాళ సాయంత్రం మాజీ సీఎం కుమారస్వామి పరామర్శించారు. అనంతరం మీడియాతో మాట్లాడుతూ.. మంత్రి  చలువరాయస్వామి వేధింపుల వల్లే అతడు ఆత్మహత్యాయత్నానికి పాల్పడ్డాడని ఆరోపించారు. డ్రైవర్‌ భార్య గ్రామ పంచాయతీ సభ్యురాలిగా ఉన్నారని.. కాంగ్రెస్‌కు మద్దతివ్వాలని మంత్రి పలుమార్లు కోరినా.. ఆమె వ్యతిరేకించారన్నారు. దీంతో ఎలాగైనా ఇబ్బందులకు గురిచేయాలని భావించి.. ఆమె భర్తను బదిలీ చేయించారని కుమారస్వామి ఆరోపించారు. ప్రజల జీవితాలతో మంత్రులు ఆటలాడుకుంటున్నారని విమర్శించారు. ప్రజలకు రక్షణ కల్పించాలనుకుంటే వెంటనే సదరు మంత్రిని కేబినెట్‌ నుంచి తొలగించాలని డిమాండ్‌ చేశారు. కుమారస్వామి ఆరోపణలపై హోంశాఖ మంత్రి జి. పరమేశ్వర కూడా స్పందించారు. సీనియర్‌ పోలీసు అధికారులతో ఈ కేసును దర్యాప్తు చేయిస్తామని హామీ ఇచ్చారు. అవసరమైతే రవాణశాఖ అధికారులనూ దర్యాప్తులో భాగస్వాముల్ని చేస్తామన్నారు.