Revanth reddy: భాజపా, భారాస బంధం తెగిపోయేది కాదు: రేవంత్‌ రెడ్డి

హైదరాబాద్: మంత్రి కేటీఆర్‌ దిల్లీ పర్యటన రాష్ట్ర ప్రయోజనాల కోసం కాదని, కల్వకుంట్ల కుటుంబ కంపెనీలపై చేసిన ఐటీ దాడుల్లో దొరికిన రహస్య ఆస్తులను విడిపించుకోవడానికేనని పీసీసీ అద్యక్షుడు రేవంత్‌ రెడ్డి ఆరోపించారు. ఈ విషయాలు మీడియాలో రాకుండా కేటీఆర్ మేనేజ్ చేశారన్నారు. ఐటీ దాడుల్లో పట్టుకున్న ఆస్తులను విడిపించుకోవడానికి కేసీఆర్ మోదీకి లొంగిపోయారన్నారు. దిల్లీ చుట్టూ ఎన్ని ప్రదక్షిణలు చేసినా తెలంగాణ గల్లీల్లో కేసీఆర్‌ను ఎవరూ నమ్మరని ధ్వజమెత్తారు.

తొమ్మిదేళ్ల పాలనలో సీఎం కేసీఆర్ తెలంగాణ రాష్ట్రాన్ని దోచుకున్నారని రేవంత్‌ ఆరోపించారు. రూ.వంద కోట్లు లిక్కర్ కుంభకోణంలో కేజ్రీవాల్‌పై విచారణ జరిపిస్తున్న మోదీ.. కేసీఆర్‌ అవినీతిపై ఎందుకు నోరు మెదపడం లేదని నిలదీశారు. రూ.లక్ష కోట్లు దోచుకున్న కేసీఆర్‌ను ఎందుకు విచారించడం లేదని ప్రశ్నించారు. నిన్న దిల్లీలో నడ్డాను, అమిత్ షాలను కలిసి వచ్చిన భాజపా నాయకులు భ్రమలు ఏమీ పెట్టుకోవద్దని సూచించారు. భాజపా, భారాస బంధం తెగిపోయేది కాదన్నారు. ఎంత కంఠశోష పెట్టుకున్నా వారి మాట ఎవరూ వినరని, తెలంగాణకు పట్టిన చీడ వదలాలంటే ఏకైక ప్రత్యామ్నాయం కాంగ్రెస్ పార్టీనేనని స్పష్టం చేశారు.