Chandrababu: ఈ ఏడాది రాష్ట ప్రజల జీవితాల్లో వెలుగులు ఖాయం: చంద్రబాబు

అమరావతి: శోభకృత్‌ నామ సంవత్సరంలో రాష్ట్రానికి అన్నీ శుభాలే జరగాలని తెదేపా అధినేత చంద్రబాబు ఆకాంక్షించారు. మంగళగిరిలోని పార్టీ కేంద్ర కార్యాలయంలో నిర్వహించిన ఉగాది వేడుకల్లో ఆయన పాల్గొని మాట్లాడారు. ‘‘వైకాపా అరాచక పాలనలో రాష్ట్రం నాలుగేళ్లు కష్టాల్లోనే ఉంది. ఈ ఏడాది నుంచి ఏపీ ప్రజల జీవితాల్లో వెలుగులు రావడం ఖాయం. పట్టభద్రుల ఎన్నికల్లో ప్రజలు తిరుగుబాటు చేసి ఓట్లేశారు.

నిత్యావసర ధరలు, పన్నులు పెరిగి ప్రజలపై మోయలేని భారం పడింది. ధరల పెరుగుదలపై రాజీలేని పోరాటం చేస్తాం. వైకాపా పాలనలో ప్రశ్నించిన వారిపై దాడులు జరిగాయి. గత 40 ఏళ్లలో ఎన్నడూ చూడని అరాచకాలు ఈ నాలుగేళ్లలో చూశాం. తెలుగుజాతి అనేక రంగాల్లో రాణిస్తోంది. నాలెడ్జ్‌ ఎకానమీలో తెలుగువారి ప్రతిష్ఠ పెరిగింది. తెలుగువారి కోసమే తెదేపా ఏర్పడింది’’ అని చంద్రబాబు అన్నారు.