TDP: ‘యాత్ర-2’ కోసం అసెంబ్లీని వాయిదా వేశారు: అచ్చెన్నాయుడు

అమరావతి: శాసనసభను వైకాపా ప్రభుత్వం అపహాస్యం చేసిందని తెదేపా రాష్ట్ర అధ్యక్షుడు కింజరాపు అచ్చెన్నాయుడు (Atchannaidu) విమర్శించారు. ఏ చట్టం తీసుకొచ్చినా అది రాష్ట్ర వినాశనానికే దారి తీసింది తప్పితే.. సామాన్య ప్రజానీకానికి ఉపయోగపడలేదన్నారు. జగన్‌ ప్రభుత్వ హయాంలో తీసుకొచ్చిన ప్రజా వ్యతిరేక చట్టాల జీవోలను దహనం చేసినట్లు తెలిపారు. 

‘‘నేడు శాసనసభ సమావేశాల చిట్టచివరి రోజు. సభను ప్రభుత్వం అపహాస్యం చేసింది. ఉదయం 9 గంటలకు సమావేశాలు ప్రారంభమవుతాయని చెప్పారు. కోరం లేకపోవడంతో సభను 9.15కి వాయిదా వేశారు. 2 గంటలైనా మళ్లీ సమావేశపరచలేదు. యాత్ర-2 సినిమా విడుదలవుతోందని అసెంబ్లీని వాయిదా వేశారు. అందుకే మేం నిరసన వ్యక్తం చేస్తూ బయటకు వచ్చాం’’ అని అన్నారు.

తెదేపా ఎమ్మెల్యే నిమ్మల రామానాయుడు మాట్లాడుతూ.. రాష్ట్ర శాసనసభ చరిత్రలో ఈ ఐదేళ్లు చీకటిరోజులన్నారు. వాకౌట్‌ చేస్తున్నామని చెప్పేందుకు కూడా మైక్‌ ఇవ్వని విధంగా ప్రతిపక్షాల గొంతు నొక్కారని ఆరోపించారు. మహిళల గౌరవాన్ని కించపరిచే విధంగా సభ జరిగిందన్నారు. రాష్ట్రాన్ని మరో 20 ఏళ్లు వెనక్కి నెట్టేలా చీకటి జీవోలను తీసుకొచ్చారని విమర్శించారు. ఆయా జీవోల వివరాలను ఆయన వెల్లడించారు.