AP News: మాచర్లలో వైకాపా గూండాలు దౌర్జన్యాలకు దిగారు.. ఎస్‌ఈసీకి అచ్చెన్న లేఖ

అమరావతి: మాచర్లలో వైకాపా అరాచకాలపై రాష్ట్ర ఎన్నికల ప్రధానాధికారికి తెదేపా ఏపీ అధ్యక్షుడు అచ్చెన్నాయుడు (Atchannaidu) లేఖ రాశారు. ఆక్రమణకు గురయ్యే పోలింగ్‌ కేంద్రాల వివరాలను లేఖలో వెల్లడించారు. ‘‘మాచర్లలో వైకాపా గూండాలు దౌర్జన్యాలకు దిగారు. అక్కడి సమస్యాత్మక పోలింగ్‌ కేంద్రాల్లో భద్రతను కట్టుదిట్టం చేయాలి. ఎన్నికలు ప్రశాంతంగా జరిగేందుకు తగు చర్యలు తీసుకోవాలి’’ అని లేఖలో పేర్కొన్నారు. 2021 స్థానిక ఎన్నికల్లో ప్రతిపక్ష అభ్యర్థులను నామినేషన్లు వేయనీయలేదని, 2009, 2014, 2109లో స్థానిక ఎన్నికల్లో ఓటింగ్‌ విశ్లేషించాలని ఎన్నికల సంఘానికి విజ్ఞప్తి చేశారు. 

మరో తెదేపా నేత షరీఫ్‌ కూడా ఎన్నికల రాష్ట్ర ఎన్నికల ప్రధానాధికారికి లేఖ రాశారు. వైకాపా ఎమ్మెల్యే అన్నా రాంబాబు వాలంటీర్లకు డబ్బులు పంచారని ఆరోపించారు. సమగ్ర విచారణ చేసి ఎమ్మెల్యేపై, రాజకీయ పార్టీ భేటీకి హాజరైన వాలంటీర్లపై చర్యలు తీసుకోవాలని కోరారు.