Huzurabad by election: తెరాస నేత కౌశిక్‌రెడ్డికి చేదు అనుభవం.. స్థానికేతరుడంటూ అడ్డగింత

హుజూరాబాద్‌: హుజూరాబాద్‌లో ఉప ఎన్నికల పోలింగ్‌ కొనసాగుతోంది. కాగా ఆ నియోజకవర్గంలోని ఘన్ముక్లలో తెరాస నేత పాడి కౌశిక్‌రెడ్డికి చేదు అనుభవం ఎదురైంది. ఆయన ఘన్ముక్ల పోలింగ్‌ కేంద్రం వద్దకు రాగా.. స్థానికేతరులకు ఇక్కడ ఏం పని అని అంటూ భాజపా శ్రేణులు నిలదీశారు. ఈ క్రమంలో కౌశిక్‌రెడ్డి, భాజపా శ్రేణుల మధ్య వాగ్వాదం జరిగింది. ఫలితంగా పోలింగ్‌ కేంద్రం కొద్దిసేపు ఉద్రిక్త వాతావరణం నెలకొంది. అనంతరం కౌశిక్‌రెడ్డి అక్కడి నుంచి వెళ్లిపోయారు. ఉదయం 9 గంటల వరకు హుజూరాబాద్‌లో 10.50 శాతం పోలింగ్‌ నమోదైనట్లు ఎన్నికల అధికారులు ప్రకటించారు.

వీణవంకలోనూ..

పోలింగ్‌ కేంద్రాల వద్ద తెరాస నేత కౌశిక్‌రెడ్డికి ఇబ్బందులు తప్పడం లేదు. ఘున్మక్లలాగే వీణవంక పోలింగ్‌ కేంద్రం వద్ద కూడా కౌశిక్‌రెడ్డిని అడ్డుకున్నారు. వీణవంక జడ్పీ ఉన్నత పాఠశాల పోలింగ్‌ కేంద్రానికి ఆయన వెళ్లగానే తెరాస మినహా ఇతర పార్టీల కార్యకర్తలు ఆయన్ను అడ్డుకున్నారు.