వ్యక్తిగత ప్రతిష్ఠకు పోవడం ఎంతవరకు సమంజసం?

మహిళా కమిషన్‌ మాజీ సభ్యురాలు, మాజీ మంత్రి మణికుమారి

పాడేరు పట్టణం, న్యూస్‌టుడే: కార్యాలయానికి కూతవేటు దూరంలో మానసిక వికలాంగురాలిపై అత్యాచారం జరిగితే వెంటనే స్పందించకుండా, ప్రతిపక్షనేత చంద్రబాబు పరామర్శకు వెళ్లినప్పుడు తాను కూడా వెళ్లి వ్యక్తిగత ప్రతిష్ఠకు పోవడం ఎంతవరకు సమంజసమని మహిళా కమిషన్‌ ఛైర్‌పర్సన్‌ వాసిరెడ్డి పద్మను మాజీ మంత్రి, కమిషన్‌ మాజీ సభ్యురాలు మత్స్యరాస మణికుమారి ప్రశ్నించారు. ప్రతిపక్షనేత చంద్రబాబుకు సమన్లు ఇచ్చానని గొప్పగా చెప్పుకోవడం కాదని, రాజకీయలకతీతంగా కమిషన్‌ చర్యలు చేపట్టాలన్నారు. అల్లూరి సీతారామరాజు జిల్లా పాడేరులో మంగళవారం ఆమె విలేకరులతో మాట్లాడారు. రోజుకు 50 నుంచి 60 మందికి సమన్లు పంపుతున్నామని చెప్పిన కమిషన్‌ దృష్టికి అల్లూరి జిల్లా సీలేరు ఘటన కనిపించలేదా అని ప్రశ్నించారు. సీలేరు పాఠశాలలో ఉపాధ్యాయులు విద్యార్థినులపై వేధింపులకు పాల్పడుతున్నారని పత్రికల్లో కథనాలు వచ్చినా, ఇప్పటివరకు ఆ ఉపాధ్యాయులకు సమన్లు ఎందుకు పంపలేదన్నారు.