China: ప్రమాణాలకు అనుగుణంగానే టార్చ్‌బేరర్‌ నియామకం: చైనా

బీజింగ్‌: గల్వాన్‌ లోయలో భారత సైనికులతో జరిగిన ఘర్షణలో ప్రమేయమున్న పీఎల్‌ఏ కర్నల్‌ క్వీ ఫాబోవాను.. వింటర్‌ ఒలింపిక్స్‌ టార్చ్‌బేరర్‌గా నియమించడాన్ని చైనా సమర్థించుకుంది. ఇందులో రాజకీయ దురుద్దేశమేమీ లేదని చైనా విదేశాంగ ప్రతినిధి ఝావో లిజియాన్‌ పేర్కొన్నారు. ఈ మేరకు సోమవారం దీనిపై పాత్రికేయులు పలు ప్రశ్నలు సంధించగా లిజియాన్‌ పై విధంగా స్పందించారు. ‘‘ప్రమాణాలకు అనుగుణంగానే వింటర్‌ ఒలింపిక్స్‌లో కర్నల్‌ క్వీ ఫాబోవాను టార్చ్‌బేరర్‌గా నియమించాం. దీనిపై అనవసర రాద్ధాంతం చేయాల్సిన అవసరం లేదు’’ అంటూ లిజియాన్‌ స్పష్టంచేశారు. హేతుబద్ధమైన పద్ధతిలో దీన్ని చూడాలని కోరారు. టార్చ్‌బేరర్‌ నియామకం విషయంలో చైనా తీరుపై ఆగ్రహం వ్యక్తంచేసిన భారత్‌ ఒలింపిక్స్‌ ప్రారంభ, ముగింపు వేడుకల్లో పాల్గొనబోమని హెచ్చరించిన విషయం తెలిసిందే. అమెరికా సైతం చైనా నిర్ణయాన్ని తప్పుపట్టింది. ఈ నేపథ్యంలోనే స్పందించిన చైనా దీన్ని రాజకీయ కోణంలో చూడాల్సిన అవసరం లేదని స్పష్టంచేస్తూ.. తన నిర్ణయాన్ని సమర్థించుకుంది.