శ్రీకాంత్‌ ఔట్‌

బాసెల్‌: స్విస్‌ ఓపెన్‌ సూపర్‌ 300 టోర్నీ నుంచి   భారత స్టార్‌ షట్లర్లు కిదాంబి శ్రీకాంత్‌, హెచ్‌.ఎస్‌ ప్రణయ్‌, పి.వి.సింధు నిష్క్రమించారు. గురువారం పురుషుల సింగిల్స్‌ ప్రిక్వార్టర్స్‌లో శ్రీకాంత్‌ 20-22, 17-21తో లీ చుక్‌ (హాంకాంగ్‌) చేతిలో పరాజయం పాలయ్యాడు. 40 నిమిషాల్లో ముగిసిన ఈ మ్యాచ్‌ తొలి గేమ్‌లో శ్రీకాంత్‌ గట్టిగా పోరాడాడు. రెండో గేమ్‌లో అనవసర తప్పిదాలు చేసి మ్యాచ్‌ను చేజార్చుకున్నాడు. అయిదో సీడ్‌ హెచ్‌.ఎస్‌.ప్రణయ్‌ 8-21, 8-21తో అన్‌ సీడెడ్‌ క్రిస్టో పొపోవ్‌ (ఫ్రాన్స్‌) చేతిలో అనూహ్యంగా ఓడిపోయాడు. పురుషుల డబుల్స్‌లో సాత్విక్‌ సాయిరాజు, చిరాగ్‌ జోడీ క్వార్టర్‌ఫైనల్లో ప్రవేశించింది. ప్రిక్వార్టర్స్‌లో సాత్విక్‌ జంట 12-21, 21-17, 28-26తో ఫాంగ్‌ చి, ఫాంగ్‌ జెన్‌ (తైపీ)పై పోరాడి గెలిచారు. మహిళల సింగిల్స్‌లో స్టార్‌ క్రీడాకారిణి పి.వి.సింధు ప్రిక్వార్టర్స్‌లో ఓడిపోయింది. మూడు గేమ్‌ల పాటు హోరాహోరీగా సాగిన మ్యాచ్‌లో సింధు 15-21, 21-12, 18-21తో వర్దని (ఇండోనేసియా) చేతిలో పరాజయంపాలైంది. అంతకుముందు తొలి రౌండ్లో సింధు 21-9, 21-16తో జెజీర స్టాడెల్‌మన్‌  (స్విట్జర్లాండ్‌)పై విజయం సాధించింది. ఆకర్షి కశ్యప్‌ 15-21, 17-21తో యోనె లీ (జర్మనీ) చేతిలో ఓడింది.