నేనైతే శుభ్‌మన్‌నే ఎంచుకుంటా: శిఖర్‌

దిల్లీ: తానే సెలక్టర్‌ని అయితే ధావన్‌కు బదులు శుభ్‌మన్‌ గిల్‌నే జట్టులో ఎంచుకుంటానని ఓపెనర్‌ శిఖర్‌ ధావన్‌ అన్నాడు. మూడు ఫార్మాట్లలో గొప్పగా రాణిస్తున్న 23 ఏళ్ల గిల్‌ సొంతగడ్డపై జరిగే వన్డే ప్రపంచకప్‌లో ఆడే జట్టులో దాదాపు స్థానం ఖరారు చేసుకున్నాడు. ‘‘శుభ్‌మన్‌ అన్ని ఫార్మాట్లలో సత్తా చాటుతున్నాడు. అతడు వరుసగా అంతర్జాతీయ మ్యాచ్‌లు ఆడుతున్నాడు. నేను ఆడట్లేదు. ఒకవేళ నేనే సెలక్టర్‌ని అయితే ధావన్‌కు బదులు శుభ్‌మన్‌ని జట్టులోకి తీసుకుంటాను. కెప్టెన్‌ రోహిత్‌శర్మ, కోచ్‌ రాహుల్‌ ద్రవిడ్‌ నన్నెంతో ప్రోత్సహించారు. వన్డే ప్రపంచకప్‌పై దృష్టితో ఆడాలని చెప్పారు. 2022లో వన్డేలో స్థిరంగా రాణించా. కానీ అవకాశాలను సద్వినియోగం చేసుకుంటూ శుభ్‌మన్‌ గిల్‌ చెలరేగాడు. నా స్థానాన్ని భర్తీ చేస్తూ సత్తా చాటాడు. కెరీర్‌లో ఇలాంటివి మామూలే. బంగ్లాదేశ్‌పై వన్డేలో ఇషాన్‌ కిషన్‌ డబుల్‌ సెంచరీ చేసినప్పుడే జట్టులో ఇక చోటు కష్టమనిపించింది’’ అని శిఖర్‌ చెప్పాడు. గతేడాది డిసెంబర్‌లో ఈ ఓపెనర్‌ తన చివరి వన్డే ఆడాడు.