Jasprit Bumrah: అలాగైతే నాకు వికెట్లే వికెట్లు: బుమ్రా

హైదరాబాద్‌: టెస్టు సిరీస్‌లో ఇంగ్లాండ్‌ బజ్‌బాల్‌ వ్యూహాన్ని అనుసరిస్తే తనకు చాలా వికెట్లు లభిస్తాయని టీమ్‌ఇండియా స్పీడ్‌స్టర్‌ జస్‌ప్రీత్‌ బుమ్రా అన్నాడు. భారత్‌లో కూడా దూకుడుగా బ్యాటింగ్‌ చేయడానికి ఇంగ్లాండ్‌ సిద్ధమవుతున్న నేపథ్యంలో బుమ్రా ఇలా స్పందించాడు. ‘‘బజ్‌బాల్‌ అన్న పదాన్ని నేను పట్టించుకోను. కానీ ఇంగ్లాండ్‌ బాగా ఆడుతోంది. దూకుడైన ఆటతో ప్రత్యర్థులను ఎదుర్కొంటోంది. మరో విధంగా కూడా టెస్టు క్రికెట్‌ ఆడొచ్చని ప్రపంచానికి చూపెడుతోంది. కానీ వాళ్లు వేగంగా ఆడితే నన్ను అలసిపోయేలా చేయలేరని, నాకు చాలా వికెట్లు దక్కుతాయని ఒక బౌలర్‌గా నేను ఆలోచిస్తా. పరిస్థితులను నాకు అనుకూలంగా ఎలా మలచుకోవాలా అని ఎప్పుడూ ఆలోచిస్తూ ఉంటా’’ అని బుమ్రా చెప్పాడు.