Ajinkya Rahane: అజింక్య రహానె అజేయ శతకం

అహ్మదాబాద్‌: ఫామ్‌ వెతుక్కుంటూ రంజీ బాట పట్టిన భారత జట్టు సీనియర్‌ బ్యాట్స్‌మన్‌ అజింక్య రహానె (108 బ్యాటింగ్‌; 250 బంతుల్లో 14×4, 2×6) అజేయ సెంచరీతో సత్తాచాటాడు. సౌరాష్ట్రతో గురువారం మొదలైన రంజీ గ్రూప్‌-డి మ్యాచ్‌లో తొలి రోజు ఆటలో రహానె ఇన్నింగ్సే హైలైట్‌. టాస్‌ గెలిచి బ్యాటింగ్‌ ఎంచుకున్న ముంబయి 44 పరుగులకే 3 వికెట్లు కోల్పోయి కష్టాల్లో పడింది. కెప్టెన్‌, ఓపెనర్‌ పృథ్వీ షా (1)తో పాటు ఆకర్షిత్‌ (8), సచిన్‌ యాదవ్‌ (19) స్వల్ప స్కోర్లకే వెనుదిరిగారు. ఈ స్థితిలో మరో సెంచరీ వీరుడు సర్ఫ్‌రాజ్‌ ఖాన్‌ (121 బ్యాటింగ్‌; 219 బంతుల్లో 15×4, 2×6)తో కలిసి రహానె ఇన్నింగ్స్‌ను నడిపించాడు. తన శైలిలో షాట్లతో అలరించిన అతడు.. సర్ఫ్‌రాజ్‌ తోడుగా అభేధ్యమైన నాలుగో వికెట్‌కు 219 పరుగులు జత చేశాడు. ఆట ఆఖరికి ముంబయి తొలి ఇన్నింగ్స్‌లో 3 వికెట్లకు 263 పరుగులతో పటిష్ఠ స్థితిలో నిలిచింది. భారీ స్కోరుపై కన్నేసింది. ఇదే మ్యాచ్‌లో మరో టీమ్‌ఇండియా ఆటగాడు చతేశ్వర్‌ పుజారా సౌరాష్ట్ర తరఫున బరిలో దిగాడు.