ప్రపంచకప్‌ కోసం విదేశీ ఆటగాళ్లు

జట్టులోకి తీసుకున్న ఘనా

అక్రా (ఘనా): ఫుట్‌బాల్‌ ప్రపంచకప్‌లో ఉత్తమ ప్రదర్శన దిశగా ఘనా సన్నాహకాలు మొదలెట్టింది. ఈ ఏడాది నవంబర్‌ 21న ఖతార్‌లో ఆరంభమయ్యే ఈ టోర్నీ కోసం కొత్తగా అయిదుగురు విదేశీ ఆటగాళ్లను జట్టులోకి తీసుకుంది. అండర్‌-21 విభాగంలో.. ఇంగ్లాండ్‌కు ఆడిన తరీఖ్‌ లాంప్టే, జర్మనీకి ప్రాతినిథ్యం వహించిన స్టీఫన్‌ ఆంబ్రోసియస్‌, రాన్స్‌ఫోర్డ్‌తో పాటు స్పెయిన్‌ తరపున ఓ స్నేహపూర్వక మ్యాచ్‌ ఆడిన విలియమ్స్‌, మరో జర్మనీ ఆటగాడు పాట్రిక్‌ ఫీఫర్‌ను ఘనా చేర్చుకుంది. ఈ ఆటగాళ్ల తమ దేశం తరపున ఆడేందుకు జాతీయత మార్చుకున్నారని ఘనా సాకర్‌ సమాఖ్య బుధవారం వెల్లడించింది. ఫిఫా నిబంధనల ప్రకారం తమ దేశం తరపున ఒక్క అంతర్జాతీయ మ్యాచ్‌ కూడా ఆడని ఆటగాళ్లు.. ఇలా ఇతర దేశాలకు ప్రాతినిథ్యం వహించొచ్చు. 2014 తర్వాత తొలిసారి, మొత్తంగా నాలుగో సారి ప్రపంచకప్‌కు అర్హత సాధించిన ఘనా.. పోర్చుగల్‌, దక్షిణ కొరియా, ఉరుగ్వేతో కలిసి గ్రూప్‌- హెచ్‌లో ఉంది.