ఆస్ట్రేలియా 16 ఏళ్ల తర్వాత..

ప్రపంచకప్‌ ప్రిక్వార్టర్స్‌లోకి

డెన్మార్క్‌కు షాక్‌ 

ఆస్ట్రేలియా 1.. డెన్మార్క్‌ 0

అల్‌ వాక్రా: ఆస్ట్రేలియా నిరీక్షణ ఫలించింది. 16 ఏళ్ల విరామం తర్వాత ఆ జట్టు ఫిఫా ప్రపంచకప్‌లో నాకౌట్‌ చేరింది. బుధవారం గ్రూప్‌-డి పోరులో సాకరూస్‌ జట్టు 1-0తో డెన్మార్క్‌కు షాకిచ్చింది. ఈ మ్యాచ్‌లో బంతి నియంత్రణ, ఎటాకింగ్‌లో ఆస్ట్రేలియా కన్నా డెన్మార్కే మెరుగ్గా కనిపించింది. తొలి 25 నిమిషాల్లోనే ఆ జట్టు మూడుసార్లు గోల్‌ ప్రయత్నం చేసింది. కానీ సఫలం కాలేకపోయింది. మరోవైపు ఆరంభంలో డిఫెన్స్‌లో బలహీనంగా కనిపించిన ఆస్ట్రేలియా నెమ్మదిగా జోరందుకుంది. ఒకవైపు డెన్మార్క్‌ దాడులను కాచుకుంటూనే ఎదురుదాడి చేసింది. ప్రథమార్థంలో ఒక్క గోలూ పడలేదు. ద్వితీయార్థంలో ఆస్ట్రేలియా ఓ సంచలన గోల్‌తో డెన్మార్క్‌ను కంగుతినిపించింది. మైదానం మధ్యలో బంతిని దొరకబుచ్చుకున్న మాథ్యూ లెక్‌కీ (60వ ని) మెరుపులా ప్రత్యర్థి గోల్‌ ప్రాంతానికి చొచ్చుకొచ్చాడు. అక్కడ అతడి ప్రయత్నాన్ని నిలువరించడానికి ఓ డెన్మార్క్‌ డిఫెండర్‌ గట్టిగానే ప్రయత్నించాడు. డ్రిబ్లింగ్‌తో మాయ చేసిన లెక్‌కీ.. అతడి కాళ్ల సందు నుంచి బంతిని తన్నేశాడు. గోల్‌ బాక్స్‌కు ఓ మూలగా దూసుకెళ్లిన ఆ బంతి డెన్మార్క్‌ కీపర్‌కు కూడా చిక్కకుండా నెట్‌ని ముద్దాడింది. ఆఖరి వరకు ఆధిక్యాన్ని కాపాడుకుని ఆస్ట్రేలియా విజయాన్నిఅందుకుంది. 3 మ్యాచ్‌ల్లో 2 గెలుపు, ఒక ఓటమితో గ్రూప్‌-డిలో ఆస్ట్రేలియా రెండో స్థానంతో ముందంజ వేసింది. మరోవైపు 2 ఓటములు, ఓ డ్రాతో ప్రపంచ పదో ర్యాంకు జట్టు డెన్మార్క్‌ టోర్నీ నుంచి నిష్క్రమించింది.